Pagbabalik (Revised with English translation)

Tuwing hatinggabi,

Nagkukubli ako sa katahimikan

At taimtim na nakikinig sa anumang iluwal ng dilim:

Ang mga kulisap na waring naghahabi ng kanilang awit sa laylayan ng gabi,

Ang alulong ng asong nagmumula sa kabila ng mga natutulog na tahanan,

Paghipo ng di-mapakaling kamay ng hangin sa mga dahoon,

Maging ang mga lamok, mga mumunting sugo ng pangamba na may pakpak na pilak.

 

Naghihintay ako,

Tiyak na sa gitna ng habing ito ng mga tunog

Ay muling maririnig ang nakasanayang yabag—

Mga kilalang yabag, gaya ng pagkakakilala ng dalampasigan sa dagat,

Taglay ang mga salitang:

Mahal, narito na ako.

Kaya't iniiwang bukás ang pintuan ng aking puso,

Parang ilawang patuloy na nag-aalab sa isang bintanang walang nakakakita, nakikinig

Sa sandaling ang pagkawala ay muling maging pagdating.

Ngunit walang dumarating.

Tanging ang gabi,

Kasing lalim ng isang liham na hindi naisulat.

English Translation

Every midnight,

I immerse myself in silence
And listen to whatever the dark sets loose:

The crickets stitching their small songs into the hem of the night,

A dog howling somewhere beyond the sleeping houses,

The wind laying its restless hands upon the leaves,

Even the mosquitoes, tiny harbingers with their silver threats.

 

I wait,

Certain that through this woven cloak of sounds

Those familiar footsteps will return—

Footsteps I know as the shore knows the tide,

Carrying the words:

My love, I am here.

So I keep the door of my heart unlatched,

A lamp burning in an unseen window, listening for the sound

Of absence turning back into presence.

But nothing comes.

Only the night,

Deep as an unwritten letter.

Ang Ngalan mo (With English Translation)

Nagising ako mula sa isang panaginip.

Nakita raw kitang ipinipinta ang kalikasan—

Kinulayan ng bughaw ang kalangitan,

Luntian ang parang. At sa puno

Nagpinta ka ng ibong walang sawa sa pag-awit.

Humalimuyak ang bango matapos kang

Magpinta ng iba’t ibang uri, hugis, laki, at kulay ng bulaklak.

 

Lumapit ako sa iyo at lumingon ka.

Nagpinta ka ng pulang puso sa aking dibdib

Pagkatapos ay marahan mong inilapat

Ang iyong tenga upang pakinggan ang pintig.

Bigla kang inangkin nito.

 

Nagising akong isinisigaw ng puso ko ang ngalan mo.

English Translation

Your Name

I woke from a dream.

I saw you painting nature—

you colored the sky blue,

the fields green. And upon the tree

you painted a bird that never tires of singing.

Fragrance drifted through the air after you

painted flowers of every kind, shape, size, and color.

I came closer to you and you turned.

You painted a red heart on my chest,

then gently pressed your ear

to listen to its beating.

Suddenly, it claimed you.

I woke with my heart shouting your name.

Orininal title is "Ikaw" with Direct translation "You"

Unang Ulan ng Mayo (Revised with English Translation)

Mayo rin noon.

 

Hubad tayong magkatalikod sa inyong kama.

Tila dalawang estrangherong naipit sa digma.

Subalit, walang bahagi ng isa’t isa ang hindi natin kilala.

Kabisado ng ating puso ang bawat tunog na kayang likhain ng laman,

Bawat marahang pagbasag ng hininga, bawat paghingal na tila pagtataksil sa sarili.

Kilala ko ang bawat hugis at kurba ng iyong katawan

Na daang-ulit nang binagtas at ginalugad,

Gaya ng malalim na pagkakakilala mo sa akin.

Gano’n pa man, kahit ilang ulit nating inaangkin ang isa’t isa

Hindi natin kailanman ito naging pagmamay-ari.

 

Umapaw na ang alulod bago pa man magpasyang lumuha ang langit.

Musika ang iyong banayad na hilik na sinasaliwan

Ng aliw-iw ng hangin. Tumayo ako at nagbihis sa gitna ng katahimikan.

"Hintayin mo nang tumila ang ulan," wika mo habang pinagmamasdan akong umalis

Ang tinig mo'y tila panaginip, hindi ako lumingon.

"Gamot daw ang unang ulan ng Mayo," ang tanging tugon ko.

English Translation

The First Rain of May

 

It was May then, too.

We were naked, backs turned to each other in your bed.

Like two strangers caught in a war.

But, there was no part of each other we did not know.

We knew by heart every sound the flesh could create,

Each gentle shattering of breath, each gasp that felt like a betrayal of oneself.

I knew every shape and curve of your body

That had been crossed and explored a hundred times over,

Just as you deeply knew me.

Even so, no matter how many times we claimed each other

It was never ours to own.

 

The gutter had already overflowed before the sky decided to weep.

Your gentle snoring was music accompanied

By the murmur of the wind. I stood up and dressed in the midst of silence.

“Wait for the rain to stop,” you said as you watched me leave

Your voice was like a dream, I did not look back.

“They say, first rain of May, washes everything clean,” was my only reply.

Ang Ating Mundo (Revised with English Translation)

Dumating kang tila isang tahimik na hangin

at hinawi ang mga sapot

sa apat na nakalimutang sulok ng aking silid,

pawang pinapalis mo ang mga alikabok mula sa alaala.

 

Iniligpit mo ang mga kalat:

mga luma at bagong aklat

na umaalingasaw ng nakaraan at kasalukuyan,

mga liham na nakarating sa akin,

at yaong hindi kailanman nakatawid

mula sa pagnanais na maipadala.

 

Binuksan mo ang pintuan, ang mga bintana—

at pumasok ang liwanag na parang nag-aaya ng bagong buhay,

na tila matagal nang naghihintay

na muling bigyan ng pahintulot na umiral.

 

Nangungusap ang iyong mga mata

nang iabot mo ang iyong kamay sa akin.

Matapos mong ayusin ang aking silid,

inaalok sa akin ang iyong mundo,

hindi bilang isang malayong bagay,

kundi bilang isang mundong nilalakaran mo na,

isang mundong nais mong pasukin ko,

na para bang matagal nang nakalaan para sa akin.

English Translation

A World of Ours

You came like a quiet wind

and swept the webs

from the four forgotten corners of my room,

as if brushing dust from memory itself.

 

You gathered the scattered things:

old and new books

breathing the scent of past and present,

letters that reached me,

and those that never crossed the distance of wanting to be sent.

 

You opened the door, the windows—

and light entered like an invitation to a new life,

as if it had long been waiting

to be allowed again to exist.

 

Your eyes were speaking

as you reached out your hand to me.

After you had set my room in order,

you offered me your world,

not as something distant,

but as a place you were already walking through,

a world you wanted me to enter,

as if it had long been meant for me.

Pagitan

 Hindi lamang ikaw ang nakikita

Sa tuwing tumititig ako sa iyo.

Kundi maging ang di-nakikitang pagitan

Na kaya lamang sukatin ang distansiya

Ngunit hindi ang kung anong mayroon dito.

Sapagkat sa tuwing pagmamasdan kita

Nasa pagitan natin ang pangamba,

Ang takot, ang lahat ng alinlangan.

Kaya nananatili lamang sa ganitong ayos:

 

Ako

 

Ang pagitan natin

 

Ikaw.

 

Dahil wala namang

Namamagitan sa atin.

Pagkawasak

Nawawasak tayo

Kahit nananatiling buo

 

At ito ang pinakamasakit

Na pagkawasak:

Hindi nagkakalamat,

Hindi nababasag,

Hindi nagkakapira-piraso.

Suso Mo Inday

Matambok mong hugis,
Kaaya-ayang dulo,
Malambot mong laman,
Na kay sarap sipsipin.
Kinahuhumalingan
Ng mga bata,
Kahit kababaihan
Lalu ng mga kalalakihan.
Oh suso mo Inday
Malaman,
Masarap,
Masustansiya.

Kailan ulit matitikman?
Humayo na rito at ipatikim
Mga suso mo Inday
Na nahuhuli sa inyong palaisdaan.

*If you like this poem, please subscribe. Thank you! :)*

Kung Dumating ang Araw

Kung dumating ang araw
Na hindi na ako mag-iisa
Sa pag-aabang ng pagsikat at paglubog ng araw,
Sa pagbibilang ng mga bituin.

Kung dumating ang araw
Na hindi na ako sa hangin bubulong
Ng pagmamahal.
Kapag hindi na lamang ang sikat ng araw
Ang mainit,
Kundi maging ang titig ng buwan,
Igagapos kita
Sa aking mga bisig.
Ikukumot ko sa'yo
Ang aking katawan.
Ipaparinig ang bawat pintig
Ng pusong kaytagal naghintay
Sa iyong pag-ibig.

Kung dumating ang araw
Na hindi na ako mag-iisang
Ihahatid ng aking higaan
Sa ibang mundo.
Dahil nariyan ka na
Dalawa na tayong gagawa
Ng panibagong daigdig.
Kung saan natin matatagpuan
Ang ninanais ng ating mga puso,
Kung saan aalpas
Ang magkatalik nating puso't kaluluwa.
Doon, kung saan tayong dalawa
Ay hihimlay.

*If you like this poem, please subscribe. Thank you! :)*

Nang Hawakan Mo ang Aking Kamay

Nang hawakan mo
Ang aking kamay,
Tumibok ang puso ko.
Hindi ordinaryong tibok,
May halong galak,
May halong pananabik
Dahil matagal-tagal na rin
Nung huling pagpintig nito.

Ngunit,
Nang subukan
Kong humawak sa iyong kamay
Bumitaw ka,
At humawak sa iba.

*If you like this poem, please subscribe. Thank you! :)*

Gusto Kong Tanungin Mo Ako

Gusto kong tanungin mo ako
Ng mga bagay
Na hindi kayang ipaliwanag
Magdamag.
Para sa akin lang ang oras mo.

Gusto kong kulitin mo ako
Sa mga bagay
Na hindi mo alam.
Kahit magmukha akong tanga
Kung hindi ko alam ang sagot.
Basta akin lamang
Ang oras mo.

Pero hindi ka nagtanong,
Hindi ka nangulit.

*If you like this poem, please subscribe. Thank you! :)*